Ey tekmil-i esmâ eyledik diyen
Mertebe-i tabîata nüzûl eyleme
Ey hakîkate vâsıl olmak dileyen
Sakın ha ! mecâza rucû eyleme
Ey Yusuf'un yüzün görmek dileyen
Hüsn-ü Cemâlinden fariğ eyleme
Âhir muradına ermek dileyen
Yâri koyup ağyara meyl eyleme
Sırr-ı irfân mûcebince yol gidenler
Enfüs ve âfâkta gayra meyl eylemez
Feth-i mutlak, fevkinde feth-i mübînin
Tadlîl olanın yüzü mihrâba meyl eylemez
Kıblesi ârifin hakîkât-ı Hakkdır
Zarf ile mazrûfu asla ayırd eylemez
Eşyâ mezâhir-i esmâ, mecâlî-i Zât
Ârif, vech-i cüz'îye kat'a meyl eylemez
Ey tekmil-i esmâ eyledik diyen
Mertebe-i tabîata nüzûl eyleme
Ey hakîkate vâsıl olmak dileyen
Sakın ha ! mecâza rucû eyleme